分享對付蝸蟲既方法

我相信好多人如果發現個蝦缸有蝸蟲都會好煩惱，係我剛剛養蝦既時候，我個缸真係乜蟲都有，所以好多人都笑我係養蟲而唔係養蝦，哈哈哈~而我又真係養到d蟲又肥又白喎，吹漲

之後係不同既網站搵解決蟲蟲既方法，見人自己整個蝸蟲捕捉器好似幾好用，所以就搵d類似既野整返個，其實只係一個好普通既盒仔(照片係底下)，都係係十蚊店買既(十蚊三個)，之後只要係盒底開幾個洞，作用係等d蝸蟲自己入去，但點可以令佢有入無出又係另一問題，所以我就用個汽水蓋放係個盒入面(用野固定佢)，目的係可以放d食物(有人用紅蟲或者魚糧)入去，咁等d蝸蟲嗅到d食物之後會係盒底既洞入去，而因為有個汽水蓋既關係，d蝸蟲無辦法直接去到d食物度，就算d蝸蟲去到食物度亦無咁容易出得返黎

一切就緒既話就只要將會盒入滿水，之後放食物入去關埋會蓋，就可以直接放入會缸度，不過大家要記住關燈，因為效果會好好多，不過哩個方法都好難完全解決蝸蟲既問題，而且日日咁捉都唔係辦法

不過係大約一年前左右，有個蝦友比左包茶籽粉我(可能大家都以為係食獸師兄發明但其實唔係，係另一人而果位高人就教左我個蝦友同食獸)，佢話d茶籽粉可以殺蝸蟲同牛牛(但魚都會死，小心)，不過對蝦就無問題，叫我試下，咁我咪試一試囉，反正d蝸蟲同牛牛都煩左我一段時間，所以我就一野放入缸度，過左十五分鍾之後d白線蟲就出晒黎，跟住d牛牛就一隻一隻咁從缸邊跌落黎，蝸蟲亦都縮埋之後就無反應(死左?)，但可能我果次份量太多，所以搞到個缸好似沖泡泡浴咁，成個缸都起晒泡，所以細膽d都嚇死，過左一個鐘之後d泡仲越黎越多添，不過d蝦就無乜事，用完一日之後就要換少少水，因為d蟲蟲死左都會影響水甚至壞水。用完之後d蟲蟲同牛牛又真係無再出現喎，好神奇呀！

果次之後我每次新草入缸同反缸之前都會用茶籽粉去泡一泡，等d衰蟲遠離蝦缸，而且茶籽粉一大包(一磅)都係十蚊左右，真係又低又好用呀！


茶籽粉

DIY蝸蟲捕捉器