近排好少寫blog，原因係太忙同無乜特別話題好寫，但我對水晶蝦既興趣其實無減少過，而且眼
見討論區都無乜人肯分享同見到千篇一律既提問，所以我只好尋求另外既方法去同蝦友討論，最方便既方法緊係whatsapp啦，不過始終唔係面對面，始終會有少少隔莫，所以我最鐘意既都係親身去蝦店，有時候見到唔同既師兄雖然大家未必認識，但因為大家都係對水晶蝦有興趣，所以就一定唔會無話題
近日知道上環水坑口街既威豪遊戲堡改變身成威豪蝦舍，所以我就再次上去吹下水打下牙較，其實我認識威豪蝦舍既老闆都有一段時間，而認識既原因除左大家都有寫blog之外，重點當然係佢果手漁夫之寶水晶蝦啦。有好多朋友都會問我其實漁夫蝦有乜分別，其實我覺得講幾多都無用，你地要親身睇下先知道點解漁夫蝦有乜厲害之處。
我自己亦都係漁夫蝦既玩家同支持者，有睇我既blog(舊post)都知道我自己都買左好多隻漁夫蝦添，果時我仲幫漁夫蝦改名叫佢做喉糖蝦添，點解要改名原因係果時我仲有係討論區出帖但又唔想開估係乜蝦，但其實只要係有少少年資既玩家一見到喉糖蝦喱個名同佢既相就會知道我係講緊漁夫蝦
我亦因為漁夫蝦認識到一班玩家，好多亦都變成好友，當然包括威豪蝦舍既老細阿豪啦，好多時我地一班蝦友想入蝦，佢仲會親身過大海幫我地親自挑蝦添，而且阿豪佢亦好願意同大家分享同研究養水晶蝦既技巧，所以如果大家想睇下漁夫蝦既話，大家可以去參觀下呀！！
暫時威豪蝦舍因為剛剛完成開缸(有九個缸呀)，所以我都好期待就快到港既漁夫蝦，希望有機會可時候可以係果度碰到大家同大家一齊挑蝦啦，不過當然係先撈先得啦，哈哈~~~
沒有留言:
張貼留言