試新手法

之前用y泥頭幾個月爆蝦情況都幾理想，不過到左第五個月之後開始有死蝦，開始都唔信邪不過真係死到驚，所以係七月頭就先後反左兩個缸，反缸真係幾煩同幾累，因為我之前d泥都有成3吋幾厚，而且個缸成3呎大，淨係清泥都搞幾個鐘，所以今次反缸之後就嘗試另一個手法睇下有無可能爆蝦。

今次反缸之後就用ada new去嘗試薄泥底，一來因為平，二來爆no3都有得預，三來下次反缸只要用吸管一次過吸走晒d泥之後加返少少泥就得。

今次第一次用咁薄既泥，大約只有1cm厚左右，好多人話咁薄泥keep唔到酸，不過係事實，因為泥有製酸既作用，而且每次換水或加水之後泥底會繼續製酸，但過一段時間之後泥既製酸能力就會開始減少，所以好難keep到長期酸性。

咁點樣解決以上既問題好呢？其實唔算複雜，只要準備幾個煲湯袋，一個養水缸就可以，開缸之後將多餘既泥放入煲湯袋(我自己就一包9L ada用係一個18吋同一個3呎缸)，所以我大概有5~6L泥剩到，我就放左入三個煲湯袋度，係開缸初期就將個有泥既煲湯袋放入個缸度幾日，咁樣d泥就會開始製酸，三幾日後ph已經4.8，之後就可以取走d煲湯袋放返入養水缸度打氣同繼續養水，而養水缸因為有煲湯袋d泥，所以養出黎既水都係酸性同ph大約維持4.7~5.0左右(視乎加左幾多次水)。

而之後個蝦缸就用養水缸既水直接入缸(我自己就將水加入一個無水既外置缸度，咁蝦缸水就會慢慢加入外置缸然後新水會慢慢入返個蝦缸度，仲可以當換水添)，咁樣就算薄泥都可以keep到酸啦，而且直至煲湯袋d泥製酸能力減退我就只係需要換左煲湯袋內既泥就可以繼續養水，咁樣d反缸剷泥既時間都唔需要。

唯一要留意既係養水缸既水可能係3個星期之後可能會爆no3，不過唔洗驚，因為養水缸無蝦，所以就算100%換水都無問題，換水之後過幾日再睇下有無爆no3就可以繼續再用，係唔係好方便呢？

不過喱個手法仲係測試中(不過我知有人用緊)，但因為小弟都係第一次試所以未必成功，如果各師兄睇完有乜意見歡迎大家一齊研究下，可能會搵到更加有效既方法嫁